באריכט פון געהויבענע ימי "פורים המשולש אין טאהש" בצל הקודש (ח"ב)
מוצש"ק פר' כי תשא – שושן פורים
דער רבי איז אריינגעקומען צום דערהויבענעם שלחן הטהור לכבוד שושן פורים, והמשך פונעם משתה יין טיש, וסעודת מלוה מלכה בהיכל ביהמ"ד הגדול, וואו עס איז געווען צוגעשטעלט א רייכע סעודה פארן גאנצן ציבור.
די טיש איז פארריבער גאר דערהויבן, ווען א גרויסער ציבור איז מקיים די והשתי' כדת, כמנהג רבותינו הק' לבית זידיטשוב.
נאך לענגערע ניגוני שמחה וריקוד, האט דער בדחנא דמלכא הרב יוסף מאיר הערשקאוויטש שליט"א מנהל בית צירל אויפגעטרעטן מיט גאר הארציגע חרוזים, ארויסברענגענדיג די געוואלדיגע כח וואס דער רבי האט, זייענדיג דער הולך וממשיך השלשלת הקודש בדרכי האבות, און מיט די כח און זכותים פון רבותינו הק' נבג"מ זאל דער רבי איינרייסן פאר אונז און אויס'פועל'ן אלעס וואס מיר דארפן, זייענדיג משלב אלע ישועות ורפואות וואס אידישע קינדער דארפן האבן. די הערליכע גראמען זענען צוזאמגעשטעלט געווארן דורך הרה"ג ר' שמעון עזריאל יחיאל לאווי שליט"א, מגיד מישרים בקריתינו הק'.
דער רבי האט משמיע געווען דברות קודש ואמרות טהורות פארן גאנצן ציבור: מען זעהט אז יום הקדוש הייסט יום כפורים, ווייל עס איז נאר אזוי ווי פורים, אבער פורים אליינס איז אסאך גרעסער. פארוואס טאקע, זאגן די ספרים הק' ווייל יום הקדוש איז טאקע דער הייליגסטע טאג פון יאר, ווייל דער הייליגסטע איד דער כהן גדול, איז אריין אין די הייליגסטע פלאץ אין קדשי קדשים, און געטון די עבודה פארן אייבערשטן. אבער פורים קען יעדער איינציגסטער איד זוכה זיין צו טון די עבודה, פאר דעם איז פורים גרעסער ווי יום הקדוש.
דורך דעם וואס מען מעקט אויס דעם עמלק, דאס מיינט די יצר הרע וואס ליגט ביי זיך אין הארץ, דארף מען מתפלל זיין צום אייבערשטן מען זאל טאקע זוכה זיין דערצו, מען זאל מתפלל זיין די תפלה וואס דער כהן גדול האט מתפלל געווען יום הקדוש אין קדשי קדשים, שלא תפיל אשה פרי בטנה, דאס מיינט אז אונזערע דורות זאלן זיך האלטן ערליך, מען זאל זיי חלילה נישט פארלירן אין די שווערע נסיונות הדור, ס'זאל זיין פרה ורבה, ערליכע געזונטע קינדער יראים ושלמים וואס טוען תורה ומצות פארן אייבערשטן, און מען זאל שוין זוכה זיין צו משיח בן דוד, בביאת גואל צדק בביאת משיח צדקינו, אין זכות פון די אבות הקדושים במהרה בימינו אמן.
דערנאך האט מען געזינגן מיט גרויס התעוררות די שטייטע תמחה ניגון, און נאך עטליכע מינוטן איז דער רבי אראפ פון די בימת הכבוד, און אריין אינעם ליידיגן שטח אינמיטן טיש וואס מ'האט ליידיג געמאכט די חלל לעבודת הקודש צום 'תמחה טאנץ', און פאר לענגערע מינוטן איז דער רבי ארומגעלאפן און געטאנצן איבערזינגענדיג נאכאמאל און נאכאמאל 'תמחה את זכר עמלק מתחת השמים לא תשכח, לשנה הבאה בירושלים ג"פ', וינועו אמות הסיפים דעם ריזן גאנצע ציבור די תלמידי הישיבות און אברכים ובעלי בתים ואנשים מכובדים וואס האבן מיטגעטאנצן פון זייערע פלעצער און פון די הויכשטאקעדיגע פארענטשע'ס, אויסמעקנדיג דעם עמלק יעדער פון זייערע הערצער און פון די גאנצע וועלט, און דערנענטערנדיג די גאולה שלימה לשנה הבאה בירושלים בב"א.
נאך תמחה האט מען געזינגען שושנת יעקב, און מ'האט מכבד געווען מיט שיר המעלות הב' יהוסף שווארטץ ני"ו. ברהמ"ז על הכוס האט דער רבי מכבד געווען כ"ק אדמו"ר מ'ספינקא שליט"א.
נאכן בענטשן האט מען ארויסבאגלייט דעם רבי'ן מיטן ניגון 'ימים על ימי מלך תוסיף', און דער ציבור האט נאך ממשיך געווען מיט ריקודין עלאין בהיכל הבית המדרש הגדול ביז אין די שפעטע נאכט שעות ווען דער ציבור איז זיך צוביסליך צוגאנגען.
זונטאג פר' ויקהל – פורים המשולש
נאכמיטאג איז פארגעקומען די געהויבענע שלחן הטהור לכבוד פורים המשולש, וואו עס איז געווען צוגעשטעלט א רייכע סעודה לכל העם הנאספים.
מען האט געזינגן לעבעדיגע ניגוני שמחה, און דער רבי האט געצינדן ליכט און זיך געוואשן צום סעודה און ארויפגעשיקט שיריים פון אלע מאכלים.
במשכ'ן שלחן הטהור האט מען אויפגעשפילט א "פורים שפיל" אויפן טיש כנהוג, ווי אברכים חשובים האבן אויפגעשפילט די מעשה וואס האט זיך אפגעשפילט ביי רבינו הסבא קדישא זי"ע, וויאזוי רבינו הסב"ק איז געראטעוועט געווארן פון די הענט פונעם שונא ישראל דער נירעדהאזא מעיאר ימ"ש, און וויאזוי כל היוצא מפיו הקדוש לא נפל ארצה, און דער מעיאר האט געהאט א מיתה משונה, כן יאבדו כל אויביך ה'.
ברהמ"ז על הכוס האט דער רבי מכבד געווען הגה"צ ראב"ד סקווירא שליט"א, שיר המעלות הב' יעקב יוסף שווארץ ני"ו תלמיד ישיבה גדולה.
נאכן טיש האט מען געדאווענט תפילת מעריב בהיכל ביהמ"ד הגדול, צום עמוד איז צוגעגאנגען הרה"ח ר' ישראל אברהם סג"ל קרויס הי"ו מראשי קהלתינו הק' וויליאמסבורג.
וימי פורים האלה לא יעברו מתוך היהודים וזכרם לא יסוף מזרעם!
בילדער פונעם שלחן הטהור
לכבוד פורים המשולש - זונטאג שושן פורים
|
