לטהרנו ולקדשנו בקדושתך העליונה
דעם פארלאפענעם מיטוואך שופטים יום א' לחודש אלול, איז ב"ה צום ערשטן מאל אריין אין באנוץ די נייע הערליכע מקוה מהודרת, וועלכע איז געבויעט געווארן בהתייעצות ובברכת הקודש פון כ"ק רבינו שליט"א, בתוככי בנין ישיבתינו הק' תפארת משולם פייש אין קרית יואל.
מה נהדר היה המראה וויאזוי די טייערע בחורים האבן זיך גע'טובל'ט באשמורת הבוקר, זיך גרייטענדיג צו דינען דעם אייבערשטן במשכ'ן גאנצן טאג בקדושה ובטהרה, אן דארפן ספעציעל ארויס פארן אין די פארטאגס שעה'ן צו א מקוה און צוריק אין ישיבה.
*
שפעטער איז פארגעקומען די ערשטע חלק פארהער אויף גאנץ הלכות תפלה, ווי די תלמידי שיעור א', די כיתה פון הגה"צ רבי חיים יחיאל אלתר סג"ל שליט"א, האבן זיך פארהערט ביי הרב הגאון דומ"ץ דקהלתינו הק' קרית יואל שליט"א, און געענטפערט מחודדים בפיהם, און הרב הגאון דער דיין שליט"א איז ארויס פון התפעלות.
נאכן פארהער איז הרה"ג הדומ"ץ שליט"א אראפגעגאנגען צום אונטערשטן שטאק פון בנין הישיבה, און זיך אומגעקוקט אויף די נייע הערליכע מקוה המהודרת, און באוואונדערט די געוואלדיגע הידורים פון די מקוה.
דערנאך האט זיך דער דיין אומגעקוקט אין די דארמאטארי שטובער, און אויסגעדרוקט התרגשות אויף די מסודר'דיגקייט פון די שטובער, זאגענדיג עס איז זיכער אז די שכינה הק' רועט דא, וויבאלד אויף א פלאץ וואס איז דא נקיות איז דא השראת השכינה, אזוי אויך האט דער דיין שליט"א הנאה געהאט צו זעהן ווי די בחורים האבן ביי די בעטן צוויי טעפלעך פאר נעגל וואסער, אזוי ווי רבינו הקדוש זי"ע פלעגט שטענדיג צו פאדערן פון די תלמידים.
*
דעם זונטאג כי תצא העעל"ט האט באזוכט אין ישיבתינו הק' הרב הגאון המפורסם רבי יודא הכהן כ"ץ שליט"א גאב"ד ק"ק ויצב אברהם אסטראליע. דער חשוב'ער רב וועלכע איז מותיקי תלמידי רביה"ק זי"ע האט געהאלטן א גאר אינהאלטספולע דרשת הכנה לימים נוראים.
דער רב האט איבערגעגעבן פאר די חשובע בחורים וויאזוי ס'האט אויסגעזעהן די הייליגע עבודה פון רבינו הקדוש זי"ע אין אזעלכע טעג, און האט מעורר געווען איבער יראת שמים, נאכזאגענדיג אז רבינו הקדוש זי"ע פלעגט נאכצוזאגן פונעם עלטער זיידן רבינו הסב"ק זי"ע, ווען ער האט געזען איינעם לערנען אן א הוט האט ער אים געוואלט צורייסן ווי א פיש.
רבינו הקדוש זי"ע האט קיינמאל נישט ארויסגעקוקט פון די ד' אמות, אפי' ביי זיך אין ביהמ"ד, אריינקומענדיג פרייטאג צונאכטס האט דער רבי אראפגעקוקט א גאנצע וועג, אויסער אינמיטן האט ער אויפגעהויבן צו קוקן אויף די הייליגע שבת ליכט, אבער סתם אזוי האט דער רבי אלץ אראפגעקוקט, אוודאי אין די גאס האט דער רבי נישט אויפגעהויבן די אויגן. איז גוט פאר אונז בחורים זיך צו צו געוואוינען, אז כאטש בשעת'ן לערנען, זאל מען נישט ארויסקוקן פון די ד' אמות, עס העלפט מ'זאל קענען ארבעטן אויף די מדת סקרנות, און בכלל פארן לערנען, און אזוי קען צוגיין און מאכן די ריכטיגע הכנה צו די הייליגע טעג הבעל"ט.
דער רב שליט"א איז ארומגעגאנגען אינעם בנין הישיבה און האט שטארק באווינדערט די ישיבה, וויאזוי ס'איז אלעס צוגעשטעלט ברוחניות ובגשמיות על צד היותר הטוב.
* |
